प्रतिनिधी/ मडगाव
भारतीय जनता पक्षाने सदैव जनतेच्या हितासाठी कार्य केलेले आहे. त्यामुळे भारतीय जनता पक्षाला आणखी मजबूत बनवण्याकरिता कार्यकर्त्यांसाठी प्रशिक्षण शिबिराचे आयोजन केले जाते. यात कार्यकर्त्यांना भाजपच्या कार्यप्रणालीसंदर्भात माहिती दिली जाते असे, भाजपचे प्रदेश सरचिणीस दामू नाईक यांनी सांगितले.
मठसंकुल फातोर्डा येथे कार्यकर्त्यासाठी आयोजित केलेल्या प्रशिक्षण शिबिराच्या उद्घाटन प्रसंगी ते बोलत होते. यावेळी व्यासपीठावर भाजपचे संघटनमंत्री सतीश धोंड, दक्षिण गोवा भाजपचे अध्यक्ष तुळशीदास नाईक, फातोर्डा भाजप मंडळाचे अध्यक्ष मनोहर बोरकर व इतरांची उपस्थिती होती.
जनसंघ ते भाजपचा प्रवास तसेच केंद्र सरकारच्या उपलब्धी विषयी यावेळी कार्यकर्त्यांना माहिती दिली जाते. तसेच दोन दिवस चालणाऱया या शिबीरात भाजपचे अनेक मंत्री कार्यकर्त्यांना मार्गदर्शन करतील असे नाईक यांनी यावेळी स्पष्ट केले.
मठसंकुल फातार्डा येथे आयोजित केलेल्या भाजपच्या कार्यकर्ता प्रशिक्षण शिबिरात फातोर्डा, कुडतरी व नुवे या तीन मतदारसंघातील कार्यकर्ते सहभागी झाले होते.