झोपण्याची योग्य पद्धत काय किंवा तुम्ही कसे झोपता याच्या उत्तरादाखल ज्या पद्धती सांगितल्या जातात त्या पाहता एक गोष्ट नक्कीच स्पष्ट होते की 92 टक्के लोक योग्य पद्धतीने झोपत नाहीत. परिणामी, अशा व्यक्तींना मानदुखी, पाठदुखी आणि कंबरदुखीबरोबरच डोकेदुखीचाही त्रास होऊ शकतो.
झोपण्याच्या अयोग्य स्थितीचा परिणाम हा पचनसंस्थेवरही होत असतो. झोपेच्या गुणवत्तेविषयी अभ्यास करणार्या तज्ञांनी 2 हजार जणांचा अभ्यास करून झोपण्याच्या योग्य स्थितीबाबत महत्त्वपूर्ण संदेश दिला आहे.
त्यानुसार उताणे झोपणे हे अनेक दृष्टीने फायदेशीर असल्याचे समोर आले आहे. नियमितपणे असे झोपण्यामुळे केवळ डोके, पाठ, मान आणि कंबर आदी तक्रारींबरोबरच सुरकुत्या पडण्याची समस्याही दूर होते. त्याचबरोबर सायनसचा त्रास असणार्या व्यक्तिंनाही आराम पडतो. अर्थात पाठीवर झोपल्याने मणक्यावर भार पडतो. त्यासाठी गुडघ्यांच्या खाली उशी ठेवणे खूप महत्त्वाचे आहे. ज्या लोकांना मणक्याचा त्रास आहे, त्यांना मात्र पाठीवर जास्त वेळ झोपणे टाळायला हवे.
* या संशोधनातील अभ्यासकांच्या मते पाठीवर झोपल्याने मानेच्या स्नायूंवर जास्त दबाव पडत नाही. तसेच हे स्नायू ताणले जाण्याचा धोकाही कमी होतो. डोके जड होण्याची समस्या दूर होते. मान, पाठ यांच्या वेदनांची तक्रार सतावत नाही.
* पाठीवर झोपल्याने त्वचेतील कोलेजेनची लवचिकता टिकून राहते आणि त्यामुळे अकाली वयात त्वचेवर सुरकुत्या पडत नाहीत. जेव्हा आपण पोटावर झोपतो, एका अंगावर झोपतो तेव्हा उशी, चादर त्वचेवर घासली जाते. त्यामुळे पेशींचे नुकसान होऊ शकते.
* पाठीवर झोपल्याने नाकातील सायनसच्या पोकळीवर जास्त भार पडत नाही. त्यामुळे त्या पोकळीत जमा झालेले द्रव्य डोके आणि डोळे याच्या आसपासच्या भागातील नसांमध्ये वाहू शकत नाही. परिणामी, डोकेदुखी, डोळ्यात जळजळ, खाज येणे, सर्दी यांसारखे त्रास भेडसावण्याची शक्यता कमी होते. * संशोधकांनी असा दावा केला आहे की पाठीवर झोपल्यास वाकून उभे राहाणे किंवा वाकून बसणे या सवयी सुटण्यास मदत होते. पाठीवर झोपल्याने पाठीचा मणका सरळ राहातो आणि स्नायू आखडत नाहीत किंवा खेचले जात नाहीत. कंबर, नितंब, गुडघे आणि पायाच्या वेदना यांच्यापासून आराम मिळतो.