प्रतिनिधी/ बेळगाव
बी. टी. पाटील उद्योग समूहाचे ज्येष्ठ व्यवस्थापक राजीव कुलकर्णी यांच्या बेनकनहळ्ळी जवळील के. एच. बी. कॉलनी शेजारी असलेल्या फार्महाऊसमध्ये चोरी झाली आहे. चोरटय़ांनी सुमारे सव्वालाखाचे साहित्य चोरले आहे.
राजीव कुलकर्णी हे सोमवार पेठ टिळकवाडी येथे राहतात. त्यांनी आपल्या शेताच्या चारही बाजूंनी उंच असे पत्राचे कंपाऊंड उभे केले आहे. त्याला नेहमी कुलुप लावलेले असते. या कंपाऊंंडच्या आतमध्ये एक छोटेसे घर उभारलेले आहे. या घरात चोरीची घटना घडली आहे.
चोरटय़ांनी 85 हजार रुपये किमतीचे डिझेल जनरेटर, 30 हजार किमतीचे कटिंग मशीन, साडेसात हजार रुपये किमतीचे 1 एचपीची इलेक्ट्रिक मोटर, चार हजार किमतीची किटकनाशक फवारणी पंप चोरले आहेत. लॉकडाऊनच्या काळात कुलुप तोडून चोरटय़ांनी घरात प्रवेश केला असून साहित्याबरोबरच शेतातील फळेही चोरण्यात आले आहेत. बेळगाव ग्रामीण पोलीस स्थानकात या घटनेची नोंद झाली असून पोलीस पुढील तपास करीत आहेत.