ऑनलाईन टीम / नवी दिल्ली :
फिलिपाईन्स भारताकडून जगातील सर्वात वेगवान अशा ब्रह्मोस या सुपरसॉनिक जहाजविरोधी क्रूझ क्षेपणास्त्राची खरेदी करणार आहे. ब्रह्मोस क्षेपणास्त्राची ही पहिली परकीय ऑर्डर आहे. हा करार 374.9 दशलक्ष डॉलर्सचा आहे. फिलिपाईन्सच्या संरक्षण विभागाने ही माहिती दिली आहे.
फिलिपाईन्सचा दक्षिण चीन समुद्रातील अधिकारक्षेत्रावरून चीनशी वाद आहे. ब्राह्मोस क्षेपणास्त्र फिलिपाईन्स आपल्या याच किनारपट्टीच्या भागात तैनात करणार आहे. त्यामुळे दक्षिण चीन समुद्रात आपली दादागिरी दाखवणाऱया चीनला या कराराचा मोठा धक्का बसला आहे. कारण ब्रह्मोस सुपरसॉनिक क्षेपणास्त्र 4321 किमी प्रतितास वेगाने ध्वनीच्या वेगाच्या तिप्पट मारा करण्यास सक्षम आहे. हे क्षेपणास्त्र फिलिपाईन्सचा किनारपट्टीचा भाग सुरक्षित करेल.
सूत्रांनी सांगितले की, डीआरडीओ (संरक्षण संशोधन आणि विकास संघटना) आणि ब्रह्मोस एरोस्पेस मित्रराष्ट्रांना क्षेपणास्त्र निर्यात करण्यासाठी जोरदार प्रयत्न करीत आहेत. डीआरडीओने अलीकडेच अमेरिकेबरोबर मेड इन इंडिया रडार करारही केला होता. इतर काही देशांशी करारही अंतिम टप्प्यात असल्याने भारताला इतर मित्रराष्ट्रांकडून क्षेपणास्त्र प्रणाली खरेदीची ऑर्डर मिळण्याची शक्यता आहे.