ऑनलाईन टीम / तिरूअनंतपुरम :
केरळच्या मलप्पुरम येथील पुंगोड येथे एका फुटबॉल सामन्यादरम्यान प्रेक्षक गॅलरी कोसळून 200 हून अधिक जण जखमी झाले आहेत. त्यामधील 5 जण गंभीर जखमी आहेत. त्यांच्यावर खासगी रुग्णालयात उपचार सुरू आहेत. शनिवारी रात्री नऊच्या सुमारास ही घटना घडली. ही सर्व घटना सीसीटिव्हीमध्ये कैद झाली आहे.
मलप्पुरम जिल्ह्यातील वंदूरजवळील पुंगोड येथे फुटबॉलचे सामने भरविण्यात आले होते. या सामन्यांसाठी तात्पुरती प्रेक्षक गॅलरीही उभारण्यात आली होती. शनिवारी रात्री 9 च्या सुमारास जळपास दोन हजार लोक हे सामने पाहण्यासाठी मैदानात हजर होते. दरम्यान, सामना सुरू होण्यापूर्वीच पेक्षकांनी भरलेली गॅलरी कोसळली. या दुदैवी घटनेत 200 हून अधिक लोक जखमी झाले आहेत. त्यामधील 5 जण गंभीर जखमी आहेत. त्यांच्यावर खासगी रुग्णालयात उपचार सुरू आहेत. दरम्यान, या घटनेच्या चौकशीची मागणी होत असून, पोलीस काय भूमिका घेणार याकडे सर्वांचे लक्ष लागले आहे.