वाई पोलिस गुन्हे प्रकटीकरण पथकाची पुणे येथे कारवाई
प्रतिनिधी / वाई
फेसबुकवरील महिला व मुलींच्या फोटोंमध्ये फेरफार करून अश्लिल फोटो फेसबूक व समाज माध्यमांवर सोडून त्यांची बदनामी केल्याप्रकरणी एकास अटक करण्यात आली असून त्याला दोन दिवसांची पोलिस कोठडी सुनावली आहे. जानेवारी २०२० मध्ये याप्रकरणी गुन्हा दाखल करण्यात आला होता. तेव्हापासून त्या पोलिसांकडून आरोपीचा शोध सुरू होता. वाई गुन्हे प्रकटीकरणच्या शाखेने तांत्रिक माहितीच्या आधारे सिंहगड रोड, पुणे येथील एका हॉटेलमध्ये सापळा रचून आरोपीला गजाआड केले. प्रविण रेमजे असे संशयितांचे नाव आहे. त्यास वाई न्यायालयाने कोठडी तीन दिवसांची पोलीस कोठडी सुनावली आहे.
जानेवारी २०२० दरम्यान एका मुलीस बनावट फेसबुक खात्यावरून संशयिताने फेसबुक मेसेंजर ओळख काढली. यावेळी त्याने मुलीचा व्हॉटसअॅप मोबाईल नंबर घेतला. यानंतर तिच्या फेसबुकवरील फोटोचा गैरवापर करुन अश्लिल फोटो तयार केले. ते फोटो मुलीला पाठविले, तसेच बनावट फेसवबुक खात्यावर पाठविले. याबाबत पीडित मुलीच्या दाखल तक्रारीवरून पोलीस निरिक्षक आनंदराव खोबरे यांनी अज्ञात आरोपीचा तांत्रिक पध्दतीने व बातमीदारामार्फत तपास केला. आरोपीने बीड येथील दुसऱ्याच्या नावावर असलेल्या सिमकार्डचा वापर करुन बनावट फेसबुक खाते उघडून वाशी, रत्नागीरी, वाई येथील मुली व महिलांची अशाच पद्धतीने बदनामी होईल, असे कृत्य केल्याचे व त्याच्यावर सदर पोलीस ठाण्यात गुन्हे दाखल असल्याची माहिती समोर आली. पुणे येथे हॉटेलमध्ये वेटरकाम करताना सहकाऱ्याचे सिमकार्ड चोरून संशयिताने हे गैर कृत्य केले. संशयिताचे सर्व मोबाईल बंद लागत होते व त्याच्या सध्याच्या ठावठिकाणांची माहिती प्राप्त होत नव्हती. त्यामुळे आरोपी मिळून येत नव्हता. तपास अधिकारी आनंदराव खोबरे यांनी तांत्रिक माहिती मिळवत कसोशीने तपास केला. त्याला पुणे येथून ताब्यात घेतले. न्यायालयाने त्याची तीन दिवसांच्या पोलीस कोठडीत रवानगी केली आहे.
पोलीस अधीक्षक अजयकुमार बन्सल, अप्पर पोलीस अधीक्षक सातारा धीरज पाटील, उपविभागीय पोलीस अधिकारी श्रीमती शितल जानवे-खराडे यांच्या मार्गदर्शनाखाली पोलिस निरिक्षक आनंदराव खोबरे यांच्या सुचनांप्रमाणे सहाय्यक पोलीस उपनिरीक्षक विजय शिर्के, कृष्णराज पवार, पो. ना. प्रशांत शिंदे, पो. कॉ. सोमनाथ वल्लाळ, किरण निंबाळकर, श्रावण राठोड, अक्षय नेवसे यांनी केली.