प्रतिनिधी/ म्हसवड
माण तालुक्यातील एका चित्रपट निर्मात्याच्या चित्रपटातील शुटींगमधील फोटोंचा गैरवापर करत अनोळखी महिलेच्या फोटोशी फोटो जोडून फेसबुकवरील फेक अकौंटवरुन निर्मात्याची बदनामी केल्याप्रकरणी आकाशनंद अजितानंद जाधव (रा. दहिवडी, ता. माण) याच्यावर म्हसवड पोलीस ठाण्यात गुन्हा दाखल झाला आहे.
याबाबत चित्रपट निर्माते, दिग्दर्शक शशिकांत विठ्ठल डोईफोडे (वय 48, रा. पळशी, ता. माण) यांनी तक्रार दिली आहे. पोलिसांनी दिलेल्या माहितीनुसार तक्रारदार डोईफोडे हे दि. 30 मे 2017 ते 13 नोव्हेंबर 2019 या कालावधीत चित्रपट निर्मिती करत होते. चित्रपटाच्या शुटींगमधील काही फोटोंमधील फोटो शॉटचा गैरवापर करुन अश्लिलपणे दादा राठोड नावाच्या फेक अकाऊंटवर फोटो अपलोड करुन ते फोटो अनोळखी महिलेशी जोडले. हे सर्व फोटो सोशल मिडियावर आले.
हे कृत्य आकाशनंद जाधव याने केल्याची डोईफोडे यांची तक्रार असून यामुळे त्यांची बदनामी झाली. त्यातून त्यांना मानसिक त्रास झाला तसेच त्यांच्या हातून दोन नवीन सिनेमाची कामे गेल्याने त्यांना आर्थिक नुकसानही सहन करावे लागले आहे. या प्रकाराने जगणे मुश्किल झाल्याने त्यांनी दि. 6 रोजी तक्रार दिली. याप्रकरणी जाधव याच्यावर गुन्हा दाखल झाला असून दहिवडी विभागाचे उपविभागीय पोलीस अधिकारी डॉ. निलेश देशमुख याबाबत पुढील तपास करत आहेत.