लागोपाठ सण असल्याने लॉकडाऊन असतानाही खरेदीसाठी नागरिक रस्त्यावर
प्रतिनिधी/ सातारा
विकेंड लॉकडाऊननंतर येणाऱया सणांच्या पार्श्वभूमीवर खरेदीसाठी सोमवारी बाजारपेठेत नागरिकांची एकच झुंबड उडाली होती. त्यामुळे शहरातील मोती चौक ते पाचशे एक पाटी, शनिवार चौक ते पोलीस करमणुक केंद्र, राधिका रोड, गोलबाग परिसर, राजपथ मार्ग, खणआळी आदी शहरातील मार्गावर वाहतुक कोंडी झाली होती. ही गर्दी पाहता शहरात अनलॉक जाहीर करण्यात आला आहे, की काय असे वाटत होते.
आजपासुन लागोपाठ सलग चार दिवस आषाढी एकादशी, बकरी ईद, बेंदुर व गुरू पौर्णिमा हे सण असल्यामुळे नागरिकांची खरेदीसाठी बाजारपेठेत गर्दी झाली होती. अगदी सकाळी 9 पासुन ते दुपारी 4 वाजेपर्यंत ही गर्दी पहावयास मिळाली. त्यातच दुपारी 12 नंतर पावसाने चांगलीच उघडीप दिल्याने विक्रेत्यांबरोबर खरेदीदारांचा उत्साह द्विगुणीत झाला होता. त्यामुळे रस्त्यावर गर्दी ही ओसंडून वाहत होती. तसेच काही ठिकाणी तर रस्त्याच्या मधेच ट्रकसारखे अवजड वाहन थांबवुन त्यातुन दुकानांचा किंवा गोडावुनचा माल उतविण्याचा प्रकार सुरू असल्याने ही इतर वाहने जाण्यास मार्गच नव्हता. या प्रकाराकडे मात्र वाहतुक विभागाचे दुर्लक्ष झाल्याचे दिसुन आले.