बुडाने दिलेल्या नकाशामध्ये भूखंडाची रुंदी 25 फूट, सीटीसर्व्हेच्या नकाशात दर्शविली 16 फूट : सीटीसर्व्हे कार्यालयातील गैरकारभार चव्हाटय़ावर
प्रतिनिधी /बेळगाव
शहरात बुडाच्यावतीने नवीन वसाहत निर्माण करण्यात येतात. बुडाच्या वसाहतीमध्ये खरेदी केलेले भूखंड निर्विवाद असल्याचा दावा केला जातो. मात्र अलिकडे सीटीसर्व्हे कार्यालयामध्ये चालणाऱया बेकायदेशीर कामांमुळे बुडाच्या भूखंडाचा आकारदेखील कमी होत असल्याचे निदर्शनास आले आहे. बुडाने मंजूर केलेल्या भूखंडांचा आकार सीटीसर्व्हे कार्यालयामध्ये कमी दाखवत असल्याचा प्रकार निदर्शनास आला आहे. सीटीसर्व्हे कार्यालयातील गैरकारभाराच्या तक्रारी वाढल्या आहेत.
बुडाच्यावतीने शहर आणि उपनगरात विविध ठिकाणी रहिवासी वसाहती निर्माण करण्यात आल्या आहेत. निर्माण केलेल्या वसाहतींमधील भूखंड लिलाव पद्धतीने विक्री करण्यात येतात. वसाहत निर्माण करताना नगर योजना विभागाची परवानगी घेतली जाते. तसेच लेआऊट तयार करताना रस्ते, खुल्या जागा तसेच आवश्यक सुविधा उपलब्ध केल्या जातात. लेआऊट केलेल्या भूखंडांची नोंद बुडा कार्यालयात असते. लेआऊटप्रमाणेच भूखंडांची विक्री केली जाते. विक्री केल्यानंतर भूखंड खरेदी करणाऱया व्यक्तीला हक्कपत्र आणि लेआऊट नकाशा दिला जातो. तसेच खरेदीपत्रामध्ये भूखंडाची लांबी, रुंदी आणि आकार नोंद करून दिलेला असतो. त्यानुसार सीटीसर्व्हे कार्यालयात भूखंडांचे सर्वेक्षण करून सीटीसर्व्हे उतारा तयार केला जातो व त्याप्रमाणे नोंद केली जाते.
मात्र बुडाने दिलेल्या भूखंडाच्या आकारात फेरफार झाल्याचा प्रकार निदर्शनास आला आहे. विशेषतः रामतीर्थनगर वसाहतीमधील भूखंडाबाबत सीटीसर्व्हे कार्यालयात मोठय़ा प्रमाणात गैरप्रकार करण्यात आल्याचे निदर्शनास आले आहे. भूखंडांचे मोजमाप आणि नकाशा बुडाकडे असूनदेखील सीटीसर्व्हे कार्यालयात मात्र वेगळीच नोंद करण्यात येत आहे. त्यामुळे या गैरकारभाराचा फटका भूखंडधारकांना बसत आहे. रामतीर्थनगर येथील भूखंडाची लांबी, रुंदी हक्कपत्रात नोंद केल्याप्रमाणे 1440 चौरसफूट आहे. मात्र सीटीसर्व्हे कार्यालयातील नोंदीनुसार भूखंडाचा आकार 960 चौरसफूट आहे. त्यामुळे भूखंडाचा आकार कमी कसा झाला, असा मुद्दा उपस्थित झाला आहे. बुडाने दिलेल्या नकाशामध्ये भूखंडाची रुंदी 25 फूट अशी असताना सीटीसर्व्हेच्या नकाशात 16 फूट दाखविण्यात आली आहे. त्यामुळे भूखंडाची रुंदी कमी कशी झाली, असा प्रश्न निर्माण झाला आहे.
अधिकाऱयांकडून टोलवाटोलवी
याबाबत भूखंडधारकांनी बुडा कार्यालयात संपर्क साधून नकाशा आणि कागदपत्रांची शहानिशा केली. तसेच प्रत्यक्षात जागेचे मोजमापदेखील केले. बुडाने दिलेल्या हक्कपत्रानुसार व करारानुसार लांबी, रुंदीप्रमाणेच प्रत्यक्ष जागेचे मोजमाप असल्याचे निदर्शनास आले. ही माहिती सीटीसर्व्हे कार्यालयात दिली असता बुडाचे मोजमाप किंवा हक्कपत्र चुकीचे असल्याचे सांगून सीटीसर्व्हे कार्यालयात असलेल्या नोंदीनुसार दाखला देण्यात आला आहे. त्यामुळे भूखंडधारक अडचणीत सापडले आहेत. भूखंडाचे मूळमालक बुडा असून, बुडाने दिलेल्या नकाशानुसार व प्रत्यक्ष मोजमापानुसार भूखंडाचा आकार बरोबर आहे. पण सीटीसर्व्हे कार्यालयात चुकीची नोंद कशी झाली, असा प्रश्न उपस्थित झाला आहे. चुकीची दुरुस्ती करण्याची विनंती केली असता अधिकारी टोलवाटोलवी करीत आहेत.
एकाच भूखंडाचे वेगवेगळे दोन उतारे
याचप्रमाणे सरकारी कार्यालयातील एका अभियंत्याने बुडाकडून भूखंड घेतला होता. त्या ठिकाणी घर बांधण्यासाठी सर्व कागदपत्रे जमा केली. सीटीसर्व्हे कार्यालयातील उतारा घेतला. पण सीटीसर्व्हे कार्यालयात एकाच भूखंडाचे वेगवेगळे दोन उतारे तयार करण्यात आल्याचे निदर्शनास आले आहे. एकाच भूखंडाला दोन भाग दाखवून दोन सीटीएस क्रमांक देण्यात आले आहेत. अभियंत्याने दोन सीटीएस क्रमांक मिळण्यासाठी अर्ज केला नव्हता. तरीही सीटीसर्व्हे अधिकाऱयांनी एकाच मालकाच्या एकाच भूखंडाला दोन वेगवेगळे क्रमांक दिल्याचा प्रकार निदर्शनास आला आहे. बुडाच्या भूखंडाचे तुकडे करता येत नाहीत तर सीटीसर्व्हे कार्यालयाने दोन भाग कसे दाखविले, असा मुद्दा उपस्थित झाला आहे. एकच उतारा देण्यास सीटीसर्व्हे कार्यालयाने टाळाटाळ चालविली असल्याने कर्ज प्रकरण रखडले आहे.