ऑनलाईन टीम / मुंबई
गेले काही दिवस मुस्लिम महिलांची बदनामी करण्याच्या उद्देशाने गिटहब प्लॅटफार्मच्या बुली बाई या अॅपची निर्मिती करण्यात आली असून या अॅपद्वारे मुस्लिम महिलांची बदनामी केली जात आहे. या पार्श्वभूमीवर तीन जणांना अटक करण्यात आली असली तरी नजीकच्या काळात ही संख्या आणखी वाढू शकते, असे मुंबई पोलिस आयुक्त हेमंत नगराळे यांनी सांगितले बुधवारी पत्रकार परिषद घेतली यावेऴी ते बोलत होते.
यावेळी नगराळे यांनी सांगितले की, पकडलेल्यांपैकी दोघे उत्तराखंडमधील असून यामागे अजून काही कट होता का, याचा तपास पोलीस करत असल्याचे त्यांनी सांगितले.तसेच या गुन्ह्यात प्रत्यक्ष किंवा अप्रत्यक्षपणे सहभागी असलेल्या कोणालाही अटक केली जाईल आणि त्यांच्यावर कारवाई केली जाईल, असे ही ते यावेळी म्हणाले.
तसेच या प्रकरणाचा तपास हा संवेदनशील स्वरूपाचा असल्याने आम्ही अधिक तपशील सांगू शकणार नाही. तपास ऑनलाइन असल्याने तपशील शेअर केल्याने तपासात अडथळा येऊ शकतो, असे ते म्हणाले. त्यामूळे मुस्लिम महिलांची बदनामी करणाऱ्या या अॅपद्वारे गुन्हेगारांना गजाआड करण्यासाठी मुंबई पोलीसांनी तपासाची चक्रे गतीमान केली असल्याचे ही यातून स्पष्ट होते.