बेंगळूर/प्रतिनिधी
राज्यात कोरोना रुग्णांची संख्या दररोज वाढत आहे. राजधानी बेंगळूरमध्ये कोरोनाचे सर्वाधिक रुग्ण सापडत आहेत. तसेच जिल्ह्यात कोरोना तपासणी अहवाल देखील वेळाने मिळत आहेत. यातच आता बृह बेंगळूर महानगर पालिकेचे मुख्य आयुक्त गौरव गुप्ता यांनी आरटी-पीसीआर चाचणीनंतर कोरोना चाचणी अहवाल २४ तासानंतरही इंडियन काउन्सिल ऑफ मेडिकल रिसर्चच्या (आयसीएमआर) पोर्टलवर अपलोड न केल्याबद्दल प्रयोगशाळांना नोटीस पाठविली आहे. त्यामुळे संबंधित प्रयोगशाळांना ४८ तासाच्या आत उत्तर देण्यास सांगितले आहे.
राज्य सरकारच्या आदेशाचे पालन न केल्याबद्दल प्रयोगशाळाही सील करण्यात आल्या आहेत. यामध्ये मेडऑल लॅब, आरती स्कॅन आणि लॅब, आरव्ही लॅब आणि बीजीएस ग्लोबल मेडिकल कॉलेज लॅब यांचा समावेश आहे. कर्नाटक महामारी रोग अध्यादेश २०२० च्या कलम चार अंतर्गत केपीएमई नोंदणी देखील रद्द करण्यात आली आहे.
नोटीसनुसार बर्याच लोकांनी तक्रार केली आहे की लॅब आयसीएमआर पोर्टलवर अहवाल अपलोड न करताच रुग्णांना अहवाल देत आहेत. हे आयसीएमआर मार्गदर्शक तत्त्वांचे उल्लंघन आहे. या प्रयोगशाळांना देण्यात आलेली मंजुरी मागे घेण्यासाठी बीबीएमपीने आयसीएमआरला देखील पत्र लिहिले आहे.