क्रीडा प्रतिनिधी /बेळगाव
बेंगळूर येथे 22 व्या राज्यस्तरीय मास्टर जलतरण स्पर्धेत बेळगाच्या स्विमर्स क्लब बेळगावच्या ज्येष्ठ जलतरणपटूंनी 11 सुवर्ण, 11 रौप्य व 5 कांस्यपदकासह 27 पदके पटकावत घवघवीत यश संपादन केले. बेळगावच्या 6 वयस्कर जलतरणपटूंची अखिल भारतीय मास्टर जलतरण स्पर्धेसाठी निवड झाली.
बेंगळूर येथे बसवणगुडी जलतरण तलावात घेण्यात आलेल्या 22 व्या कर्नाटक राज्यस्तरीय मास्टर जलतरण स्पर्धेत बेळगावच्या जलतरणपटूंनी यश संपादन केले आहे. ही स्पर्धा 25 ते 95 या वयोगटात घेण्यात आली.
जगदीश गस्ती यांनी डी विभागात 40 ते 44 वयोगटात 3 सुवर्ण व 2 कांस्य पदके पटकाविली. कल्लाप्पा पाटीलने जी विभागात 55 ते 59 वयोगटात 3 सुवर्ण 2 रौप्य व 1 कांस्य, इंद्रजीत हलगेकरने सी विभागात 35 ते 39 वयोगटात 2 सुवर्ण, 2 रौप्य व 2 कांस्य पदक पटकाविली. लक्ष्मण कुंभार जे विभागात 70 ते 74 वयोगटात 2 सुवर्ण 2 रौप्य, बळवंत पत्तार यांनी 1 सुवर्ण पदक व 4 रौप्यपदक पटकाविली. महिलांच्या डी विभागात 40 ते 44 वयोगटात ज्योती कोरी यांनी 2 सुवर्ण 2 रौप्य, 2 कांस्य पदके पटकाविली. वरील सहाही जलतरणपटूंची अखिल भारतीय मास्टर जलतरण स्पर्धेसाठी निवड झाली आहे. हे सर्व जलतरणपटू जेएनएमसी, केएलई जलतरण तलावात सराव करत असून त्यांना उमेश कलघटगी, सुधीर कुसाने, प्रसाद तेंडोलकर, आनंदेश्वर पाटील यांचे बहुमुल्य मार्गदर्शन तर माजी खासदार डॉ. प्रभाकर कोरे, डॉ. विवेक सावजी, अविनाश पोतदार व माखी कापाडिया, लता कित्तूर यांचे प्रोत्साहन लाभत आहे.