ब्राझीलसाठी दोन लाख डोस रवाना : सौदी अरेबिया, दक्षिण आफ्रिका, मोरोक्को, बांगलादेश, म्यानमार यांच्याशीही करार
नवी दिल्ली / वृत्तसंस्था
सीरम इन्स्टिटय़ूट ऑफ इंडियाने तयार केलेल्या कोव्हिशिल्ड लसीच्या दोन लाख डोसची निर्यात ब्राझीलला करण्यात आली आहे. तसेच म्यानमार, सेशेल्स आणि मॉरिशस या देशांनाही शुक्रवारी लसीचा साठा पाठविण्यात आला. ब्राझीलला निर्यात करण्याबरोबरच सौदी अरेबिया, दक्षिण आफ्रिका, मोरोक्को, बांगलादेश, म्यानमार यांच्याशीही करार करण्यात आले असून लवकरच त्यांना लसींचा साठा पाठविला जाणार आहे. तसेच भारत मदत म्हणून भूतान, मालदीव, नेपाळ, सेशेल्स या देशांनाही कोरोना प्रतिबंधक लसीचा पुरवठा करत असल्याची माहिती केंद्रीय परराष्ट्र व्यवहार मंत्रालयाकडून देण्यात आली.
ब्राझीलचे राष्ट्रपती जैर बोल्सोनारो यांनी पंतप्रधान मोदी यांना पत्र लिहून लसींची मागणी केली होती. ब्राझीलप्रमाणेच आणखी काही देश भारताच्या संपर्कात आहेत. लवकरच या देशांना कोरोना लसीचा पुरवठा करण्याबाबत भारत सरकार निर्णय घेण्याची शक्यता आहे. श्रीलंका, अफगाणिस्तान आणि मॉरिशस या देशांच्या नियामक यंत्रणेकडून लवकरच भारताला कोरोना लसीसाठी आवश्यक ती परवानगी मिळेल. यानंतर या तीन देशांसाठी कोरोना लसीच्या पुरवठय़ाबाबतचे नियोजन केले जाणार आहे.
कोरोनामुळे मृत्यू झालेल्यांच्या बाबतीत ब्राझील जगात दुसऱया स्थानावर आहे. सर्वाधिक कोरोना मृत्यू अमेरिकेत झाले आहेत. तिथे आतापर्यंत 4 लाख 20 हजार 285 जणांचा कोरोनामुळे मृत्यू झाला आहे. ब्राझीलमध्ये कोरोनामुळे मृत्यू होण्याचे प्रमाण जास्त असल्यामुळे लसीकरण तातडीने सुरू करण्यात आले. चीनच्या सायनोव्हॅक कंपनीने तयार केलेल्या कोरोना व्हॅक लसद्वारे लसीकरण करण्याचा निर्णय झाला. पण मागणीच्या तुलनेत पुरवठा करण्यात सायनोव्हॅक कंपनीचा वेग कमी पडत असल्यामुळे वेगाने लसीकरण करणे कठीण झाले आहे. या अडचणीवर उपाय म्हणून ब्राझीलने भारतातून कोव्हिशिल्डचे दोन लाख डोस आयात करण्याचा निर्णय घेतला आहे.
खुल्या बाजारात उपलब्ध करणार
भारतातून मागविण्यात आलेली लस नागरिक खुल्या बाजारातून खरेदी करून डॉक्टरांकडून टोचून घेतील. ब्राझीलची मागणी पूर्ण करण्यासाठी पुण्यातून सिरमने तातडीने 2 लाख डोस रवाना केले आहेत. ही लसची पहिली खेप आहे. आणखी पुरवठा लवकरच होणार आहे. कोव्हिशिल्डचे 10 कोटी आणि चीनच्या कंपनीच्या लसचे 5 कोटी डोस यांच्या माध्यमातून ब्राझील देशात लसीकरण करणार आहे. नंतर लस व्यावसायिक स्वरुपात उपलब्ध करून दिली जाणार आहे.