दापोली / प्रतिनिधी
दापोली तालुक्यातील दाभोळ परिसरातील उसगांव येथील भारती शिपयार्ड कंपनीमध्ये सिव्हील फेब्रिकेशन, वॉटर सप्लाय, खडी, रेती सप्लाय, व्हिजिटेबल सप्लाय, इंटेरिअर, लेबर सप्लाय आदी छोटी मोठी कामे भारती शिपयार्ड कंपनी स्थानिक ठेकेदारांकडून करून घेत होती. मात्र आता कंपनीने या ठेकेदारांची देणी थकवल्याने ठेकेदारांनी आंदोलनाचा पवित्रा घेतला आहे.
या करिता आयोजित पत्रकार परिषदेत ठेकेदारांच्या वतीने बोलताना दाभोळ येथील सामाजिक कार्यकर्ते सुशांत खेडेकर म्हणाले की, सर्व ठेकेदार पूर्णपणे हतबल झाल्याने यापुढे कंपनीतील कोणतीही वस्तु ठेकेदारांचे पेमेंट झाल्याशिवाय कंपनीच्या बाहेर नेऊ देणार नाही. तसेच इतर कोणती दुसरी कंपनी येथील जागा भाडेतत्वावर अथवा विकत घेत असेल तर ठेकेदार स्वतःची बीले मिळाल्याशिवाय त्याही गोष्टीला विरोध करेल. त्याचाच एक भाग म्हणून अनेक वर्ष झालेल्या अन्यायाच्या विरोधात सर्व स्थानिक
ठेकेदार २८ ऑक्टोबर २०२० रोजी तहसीलदार कार्यालयाच्या समोर एक दिवसांचा आत्मक्लेश उपोषण करणार आहे असे या वेळी जाहीर करण्यात आले.