ऑनलाईन टीम / नवी दिल्ली :
भारतातील स्वदेशी लस म्हणजेच भारत बायोटेकची कोरोनावरील कोवॅक्सिन लस तिसऱ्या टप्प्यातील क्लिनिकल ट्रायलमध्ये 77.8 टक्के प्रभावी ठरली आहे. कंपनीने गेल्याच आठवड्यात ट्रायलचा डेटा ड्रग कंट्रोलर जनरल ऑफ इंडियाकडे सादर केला होता. यावर सब्जेक्ट एक्सपर्ट कमिटीची (SEC) आज बैठक झाली. या बैठकीत कोवॅक्सिन लसीच्या तिसऱ्या टप्प्यातील ट्रायलच्या डेटाला मंजुरी देण्यात आली.
कोवॅक्सिन लसीच्या तिसऱ्या टप्प्यातील चाचणी 25,800 लोकांवर करण्यात आली. या चाचणीत कोरोनाविरोधात ही लस किती प्रभावी आहे? हे या तपासण्यात आले. एसईसीच्या मान्यतेनंतर हा डेटा आता जागतिक आरोग्य संघटनेला सादर केला जाईल. कोरोना संसर्ग झाल्यास रुग्णालयात दाखल होण्याच्या रूग्णांमध्ये 100 टक्के घट असल्याचे आकडेवारी दर्शविते. कोवॅक्सिन ही लस भारत बायोटेकने इंडियन काउन्सिल ऑफ मेडिकल रिसर्चसोबत (ICMR) मिळून विकसित केली आहे.
भारत बायोटेकने यापूर्वी केवॅक्सिन लसीच्या तिसऱ्या टप्प्यातील चाचणीचे अंतरिम निष्कर्ष मार्चमध्ये जाहीर केले होते. प्राथमिक आकड्यांनुसार कोवॅक्सिन ही लस करोनापासून बचाव करण्यात 81 टक्के प्रभावी असल्याचे समोर आले आहे. भारत बायोटेकच्या एक्सप्रेशन ऑफ इंटरेस्ट (EOI) ला WHO ने स्वीकारले होते. कोवॅक्सिनच्या मंजुरीसाठी कंपनीने 19 एप्रिलला EOI हे WHO कडे सादर केले होते. आता या प्रकरणी प्री-सब्समिशन मिटिंग 23 जूनला होणार आहे.
कोवॅक्सिनला जुलै ते सप्टेंबरदरम्यान WHO कडून मंजुरी मिळू शकते. जवळपास 60 देशांमध्ये कोवॅक्सिन लसीच्या मंजुरीची प्रक्रिया सुरू आहे. या देशांमध्ये अमेरिका आणि ब्राझीलचाही समावेश आहे. मंजुरीसाठी WHO कडे अर्ज करण्यात आला आहे. कोवॅक्सिनला आतापर्यंत 13 देशांनी मंजुरी दिली आहे, असे भारत बायोटेकने म्हटले आहे.