ऑनलाईन टीम / बीजिंग :
भूतान आणि चीनच्या सीमेवर असणाऱ्या सकतेंग अभयारण्याच्या जमिनीवर आता चीनने दावा केला आहे. चीनने या अभयारण्याची जमीन वादग्रस्त असल्याचे सांगत ग्लोबल एन्व्हायरनमेंट फॅसिलिटी काऊन्सिलकडून होणाऱ्या निधी पुरवठ्याला विरोध दर्शविला आहे.
सकतेंग अभयारण्य भूतान आणि चीनच्या सीमेलगत आहे. या ठिकाणी भूतान आणि चीनच्या सीमेची आखणी अजून झालेली नसल्याने चीनने अभयारण्याची जागा बळकवण्याचा प्रयत्न केला आहे. भुतानाने चीनचा हा दावा झुगारून लावला आहे.
ग्लोबल एन्व्हायरनमेंट फॅसिलिटी काऊन्सिलच्या 58 व्या बैठकीत चीनने सकतेंग वन्यजीव अभयारण्यावर दावा सांगितला आहे. या अभयारण्यासाठी यापूर्वी कधीही, कुठूनही निधी आला नव्हता. पहिल्यांदाच अभयारण्यासाठी निधी येत असल्याने चीनने यावर दावा केला आहे. काऊन्सिलने मात्र चीनच्या विरोधानंतरही या प्रकल्पाला मंजुरी दिली आहे.