कोलकाता / वृत्तसंस्था
पश्चिम बंगालच्या मुख्यमंत्री ममता बॅनर्जी यांचे कनिष्ठ बंधू अशीम बॅनर्जी यांचे येथे शनिवारी कोरोनामुळे निधन झाले आहे. येथील एका खासगी कोरोना उपचार केंद्रात त्यांना दाखल करण्यात आले होते. तेथे त्यांच्यावर अनेक दिवस उपचार सुरू होते. तथापि, उपचारांचा उपयोग न होता, त्यांचे शनिवारी निधन झाले. ते कालीघाट येथे वास्तव्यास होते. त्यांना त्यांच्या परिसरात कालीदा म्हणून ओळखण्यात येत होते. एक महिन्यापूर्वीच त्यांना कोरोना झाल्याचे स्पष्ट झाले होते. तेव्हापासून ते याच रुग्णालयात उपचार घेत होते. त्यांना कोरोनामुळे होणारे फुप्फुसाचे विकार झाले होते, असे सांगण्यात आले. उपराष्ट्रपती व्यंकय्या नायडू यांनी यासंबंधी ममता बॅनर्जी यांना शोकसंदेश पाठवून त्यांचे सांत्वन केले आहे