पुणे/प्रतिनिधी
मराठा आरक्षणाविषयी सरकारने ठोस भूमिका घेतली नाही, तर ६ जून अर्थात शिवराज्याभिषेक दिनापर्यंत आम्ही भूमिका जाहीर करू, असा इशारा खासदार संभाजीराजे छत्रपती यांनी दिला होता. त्यामुळे आज शिवराज्याभिषेक सोहळ्यानंतर संभाजीराजे रायगडावरून काय भूमिका जाहीर करणार याकडे सगळ्यांचं लक्ष लागलं होतं. त्यानुसार रायगडावर झालेल्या शिवराज्याभिषेक दिनाच्या कार्यक्रमानंतर संभाजीराजे यांनी आपली भूमिका जाहीर करत १६ जूनपासून राज्यात आंदोलनाची हाक दिली. दरम्यान या आंदोलनाची सुरुवात कोल्हापुरातून होणार आहे. यासाठी छत्रपती शाहू महाराज यांच्या समाधीस्थळापासून पहिला मोर्चा काढणार असल्याची घोषणा संभाजीराजे यांनी केली.
यावेळी त्यांनी या आंदोलनात सर्वपक्षीय नेत्यांना सहभागी होण्याचं आवाहन केलं आहे. तसेच मागण्या मान्य न झाल्यास पुणे ते मुंबई लाँग मार्च काढण्याचा इशाराही यावेळी खासदार संभाजीराजे यांनी दिला आहे.