महाबळेश्वर / प्रतिनिधी :
महाराष्ट्र राज्य विधी सेवा प्राधिकरण मुंबई, उच्च न्यायालय, मुंबई यांच्या निर्देशाने तसेच जिल्हा विधी सेवा प्राधिकरण सातारा यांच्या मार्गदर्शनाखाली महाबळेश्वरमध्ये राष्ट्रीय लोक अदालतीचे आयोजन करण्यात आले होते. या राष्ट्रीय लोक अदालतीमध्ये एकाच दिवसात महाबळेश्वर न्यायालयातील दिवाणी व फौजदारी विभागाकडील प्रलंबित १०० प्रकरणे व १०९ वादपूर्व अशी एकूण २०९ प्रकरणे निकाली काढून १ कोटी ८७ लाख ४४ हजार ०७९ एवढी रक्कम वसूल करण्यात आली. लोक अदालतीचे पॅनेल प्रमुख न्यायाधीश शैलेश कंठे, सदस्य ॲड जे. एस. बोधे, ॲड संजय जंगम यांनी काम पाहिले.
यावेळी पंचायती समितीचे सहा गटविकास अधिकारी सांगळे, विस्तार अधिकारी सुनिल पार्टे, तालुका वकील संघाचे अध्यक्ष ॲड. विजयकुमार दस्तुरे, ॲड. एस.व्ही. जायकर, ॲड. राजेश जायकर, ॲड आर.एच. भोसले तसेच इतर विधीज्ञ, सदस्य व पक्षकार, न्यायालयीन कर्मचारी उपस्थित होते.