शिरोळ / प्रतिनिधी
शिरोळ येथील माजी खासदार राजू शेट्टी यांच्या भगिनी सुरेखा आण्णासो पाटिल पाटील यांच्या बंगल्यात तीन ते चार अज्ञात चोरट्यांनी भरदिवसा चोरी केल्याची घटना मंगळवार दुपारी पावणे पाच वाजण्याच्या सुमारास घडली. चोरट्यांनी अंदाजे चार लाख रुपये रोख पंधरा तोळ्याचे दागिने लंपास केल्याचा प्राथमिक अंदाज आहे. रात्री उशिरा गुन्हा दाखल करण्याचे काम सुरू होते.
याबाबत घटनास्थळावरून व पोलिसांतून मिळालेली सविस्तर माहिती अशी की, शिरोळ-अर्जुनवाड रोडवरील माजी खासदार राजू शेट्टी यांच्या निवासस्थानापासून काही अंतरावर राहणाऱ्या त्यांच्या भगिनी सुरेखा पाटील या आपल्या घरास कुलूप लावून काही कामानिमित्त माजी खासदार शेट्टी यांच्या घरी आल्या होत्या. घरात कोणी नसल्याचे पाहून अज्ञात 25 ते 30 वयोगटातील तीन ते चार चोरट्यांनी बंद घराचे कुलूप तोडून घरात प्रवेश केला. घरातील तिजोरी फोडून रोख रक्कम व सोन्याच्या दागिन्यांवर डल्ला मारला. यामध्ये अंदाजे रोख चार लाख रुपये 15 तोळ्याचे सोन्याचे दागिने यासह अन्य किमती वस्तूंवर चोरट्यांनी डल्ला मारला असल्याचे समजते.