बेंगळूरच्या मणिपाल इस्पितळात उपचार
प्रतिनिधी/ बेंगळूर
एकापाठोपाठ अनेक राजकारण्यांना कोरोनाचा विळखा बसत असताना त्यात आता माजी मुख्यमंत्री आणि विधानसभा विरोधी पक्षनेते सिद्धरामय्या यांनाही कोरोनाची लागण झाली आहे. रविवारी मुख्यमंत्री येडियुराप्पा यांना संसर्ग झाला होता. त्यानंतर सिद्धरामय्या देखील कोरोना पॉझिटिव्ह आढळून आले आहेत. त्या दोघांवर बेंगळूरच्या मणिपाल इस्पितळात उपचार केले जात आहेत.
कोरोना परिस्थितीत देखील जनतेच्या संपर्कात राहून काम करणाऱया लोकप्रतिनिधींना कोरोनाची लागण होताना दिसून येत आहे. आता प्रमुख नेत्यांना देखील कोरोनाची बाधा झाल्याने त्यांच्या संपर्कात आलेल्यांमध्ये भीतीचे वातावरण आहे. कोरोनाचा प्रादुर्भाव वाढल्याने माजी पंतप्रधान एच. डी. देवेगौडा यांनी मंगळवारी बोलावलेली निजद नेत्यांची बैठक रद्द केली. दरम्यान, सिद्धरामय्या यांना कोरोनाची लागण झाल्याने त्यांचा नातू धवन याने स्वतःला होम क्वारंटाईन करून घेतले आहे. 2 ऑगस्ट रोजी धवन म्हैसूरमध्ये सिद्धरामय्या यांच्या संपर्कात आला होता.
विरोधी पक्षनेते सिद्धरामय्या यांच्या स्वॅब तपासणीचा अहवाल पॉझिटिव्ह आल्यानंतर सोशल मीडियावर राजयकीय नेत्यांनी संदेश अपलोड करत सिद्धरामय्या लवकर बरे व्हावेत यासाठी प्रार्थना केल्याचे दिसून आले.