भारताला विळख्यात घेतलेल्या कोरोनाच्या या नव्या रूपाने गर्भवती महिलांना मोठय़ा प्रमाणावर बाधित केले आहे. कोरोनाग्रस्त अवस्थेतच अनेक महिलांनी अपत्यांना जन्म दिला आहे. मात्र, अपत्यासाठी सर्वोत्कृष्ट मानले गेलेले आईचे दूध मात्र त्यांना मिळेनासे झाले आहे. कारण कोरोनाग्रस्त अवस्थेत या महिला आपल्या नवजात अपत्यांना अंगावरचे दूध पाजू शकत नाहीत.
त्यामुळे मातेच्या दुधाची मागणी फार मोठय़ा प्रमाणावर वाढली असून सोशल मीडियावर तसे संदेश लाखेंच्या संख्येने दिसू लागले आहेत. रुग्णांसाठी बेड्स, ऑक्सिजन सिलिंडर किंवा औषधे यांची मागणी सोशल मीडियामधून होणे आता नवीन राहिलेले नाही. तथापि, मातेच्या दुधासाठी वाढत असलेली मागणी पाहून आहारतज्ञ आणि डॉक्टरही आश्चर्यचकित झाले आहेत.
ज्या अर्भकांचा जन्म निर्धारित कालावधीपूर्वीच होतो त्यांना अशा दुधाची आवश्यकता सर्वाधिक असते. कारण कालावधीपूर्वी त्यांचा जन्म झालेला असल्याने त्यांच्या मातेच्या शरीरात एक तर दुधाची निर्मिती झालेली नसते किंवा ती अपुरी असते. त्यामुळे अशा अर्भकांना आपले दूध देणाऱया मातांची अशावेळी आवश्यकता भासते. अनेक कोरोनाग्रस्त मातांनीही अशाप्रकारे कालावधीपूर्वीच बालकांना जन्म दिला आहे. ज्या मातांना कालावधीनंतर मुले झाली आहेत, अशा माता व्याधीग्रस्ततेमुळे अंगावरील दूध पाजू शकत नाहीत. परिणामी लोक दूध पाजू शकणाऱया निरोगी मातांच्या शोधात आहेत. अशा निरोगी मातांचे दूध काढून ते व्यवस्थितरीत्या साठविल्यास कोरोनाबाधित महिलांच्या अपत्यांना ते पाजविता येते. यासाठी दूध बँक स्थापन करण्याची आवश्यकता डॉक्टरांनी प्रतिपादन केली आहे. अनेक निरोगी माता अशाप्रकारे त्यांचे अतिरिक्त दूध दान करण्यास तयारही आहेत. फक्त त्यासाठी सुनियोजित व्यवस्थापनाची आवश्यकता असल्याचे अनेक रुग्णालयांच्या व्यवस्थापकांचे मत आहे.