सिगन चषक टी-20 क्रिकेट स्पर्धा
क्रीडा प्रतिनिधी / बेळगाव
माळमारुती स्पोर्ट्स क्लब आयोजित सिगन चषक खुल्या टी-20 क्रिकेट स्पर्धेत बुधवारी खेळविण्यात आलेल्या सामन्यात माळमारुती स्पोर्ट्स क्लब संघाने शहापूर संघाचा 55 धावांनी तर एक्स्ट्रीम स्पोर्ट्स संघाने एस. के. संकेश्वर संघाचा सुपर ओव्हरमध्ये पराभव करून पुढील फेरीत प्रवेश केला. वैष्णव संघमित्र (माळमारूती), विशाल गौरगोंडा (एक्स्ट्रिम) यांना सामनावीर पुरस्कार देण्यात आला.
युनियन जिमखाना मैदानावर खेळविण्यात आलेल्या पहिल्या सामन्यात माळमारुती संघाने 20 षटकात 7 बाद 151 धावा केल्या. त्यात वैष्णव संघमित्रने 1 षटकार, 7 चौकारासह 72, सागर देसाईने 21 धावा केल्या. शहापूरतर्फे वासीम मतवालेने 28 धावात 2 गडी बाद केले. प्रत्युत्तरादाखल शहापूर सीसी संघाचा डाव 15.1 षटकात 96 धावात आटोपला. त्यात तौसिफ मतवालेने 14 तर पवनने 13 धावा केल्या. माळमारुतीतर्फे वैष्णव संघमित्रने 20 धावात 3 तर विजय कुरीने 12 धावात 2 गडी बाद केले. दुसऱया सामन्यात एक्स्ट्रीम स्पोर्ट्सने 20 षटकात 8 बाद 127 धावा केल्या. सागर अंगडी व सुनील बस्तवाड यांनी प्रत्येकी 28 धावा केल्या. एस. के. संकेश्वरतर्फे विनायक कांबळेने 16 धावात 3, मुजीदने 36 धावात 2 गडी बाद केले. प्रत्युत्तरादाखल एस. के. संकेश्वरने 20 षटकात 8 बाद 127 धावाच केल्या. सामना टाय झाल्याने पंचांनी सुपरओव्हर नियमाचा वापर केला, त्यामध्ये एक्स्ट्रीम संघाने विजय संपादन केला. संकेश्वरतर्फे राजू सानीने 19 तर विनायक कांबळेने 13 धावा केल्या. एक्स्ट्रीमतर्फे सागर गौरगोंडा, विशाल गौरगोंडा, सचिन कलवारने प्रत्येकी 2 गडी बाद केले.