प्रतिनिधी / मिरज
कोरोनाची साखळी तोडण्यासाठी राज्य शासनाने संचारबंदी आणि जमावबंदी आदेश लागू केला असताना विनाकारण मोकाट फिरून आदेशाचा भंग करणाऱ्या तिघांवर मिरज शहर पोलिसांनी गुन्हा दाखल केला आहे. गुन्हा दाखल झालेल्यांमध्ये सलीम इमाम शेख (वय 27, रा. ख्वाजा वसाहत, झोपडपट्टी), सुनील दशरथ ऐवळे (वय 25, रा. बोलवाड रोड, मिरज) आणि ओंकार सुनील पाटील (वय 22, रा. इंदिरानगर) या तिघांचा समावेश आहे.
कोरोनाच्या पार्श्वभूमीवर शासनाने सर्वत्र संचारबंदी आदेश लागू केला आहे. याशिवाय जिल्हाधिकाऱ्यांनी जमाव बंदीचा आदेश दिला आहे. 14 एप्रिल पासून या दोन्ही आदेशांची कडक अमलबंजावणी सुरू आहे. अत्यावश्यक कामाशिवाय रस्त्यावरून फिरू नये, अशा सूचना देण्यात आल्या आहेत. असे असताना संबंधित तिघेजण संचारबंदी आणि जमावबंदी आदेश डावलून मोकाट फिरत असताना पोलिसांना मिळून आले. पोलिसांनी त्यांना अटक करून न्यायालया समोर हजर केले असताना न्यायालयाने साथरोग प्रतिबंधक कायदा, राष्ट्रीय आपत्ती कायद्यांतर्गत कलम 188 आणि 269 अन्वये गुन्हा दाखल करण्याचे आदेश दिले.