मयत तासगाव तालुक्यातील, जत शहरात केली आत्महत्या
जत / प्रतिनिधी
जत शहरातील विठ्ठल नगर शेजारील पानमळ्यात “मिस यु मित्रांनो, मिस यु भावांनो” तसेच माझ्या मृत्यूला कोणीही जबाबदार नाही, असे मोबाईल वर स्टेटस ठेवून एका तरूणाने गळफास घेऊन आत्महत्या केली. शंकर श्यामा पवार (वय 19, रा.सावळज, ता. तासगाव) असे मृत तरूणाचे नाव असून शुक्रवारी सकाळी 8 वाजण्याच्या पूर्वी ही घटना उघडकीस आली. आत्महत्येचे नेमके कारण समजू शकले नाही. मात्र, याबाबत जत पोलीस ठाण्यात नातेवाईकांनी फिर्याद दिली आहे.
पोलिसांनी दिलेली अधिक माहिती अशी की, तासगाव तालुक्यातील सावळज येथील गोलार समाजातील शंकर पवार इयत्ता बारावी मध्ये शिक्षण घेत होता. चार दिवसापूर्वीच जत येथे आपल्या बहिणी कडे तो राहण्यासाठी आला होता. गुरुवारी रात्री तो आपल्या मोबाईल स्टेटस् वर “मिस यु मित्रांनो मिस यु भावांनो” तसेच माझ्या मृत्यूला कोणीही जबाबदार नाही, असे लिहित तो बेपत्ता झाला.
त्याचा स्टेटस त्याचे जत मधील सर्व नातेवाईक बघताक्षणी त्याच्या शोधा शोध घेऊ लागले. पण त्याचा पत्ता लागला नाही. शिवाय, नातेवाईकांनी पोलीस स्टेशनची धाव घेत शंकर बेपत्ता असल्याची फिर्याद दिली. रात्रभर शोधाशोध केल्यानंतर त्याचं काही पत्ता लागला नाही. शुक्रवारी सकाळी आठच्या दरम्यान जत येथील विठ्ठल नगर शेजारी असणारे पानमळा येथील झाडास त्याने गळफास घेतला असल्याचे समजले. पोलिसांनी घटनास्थळी पंचनामा करून मृतदेह शवविच्छेदनासाठी जत ग्रामीण रूग्णालयात दाखल करण्यात आला होता. या घटनेची जत पोलीस ठाण्यात नोंद झाली आहे.