प्रतिनिधी / शिरोळ
उदगाव ( ता. शिरोळ ) येथील रुद्र रमेश मगदूम ( वठारे )वय ४ वर्षे व दानलींग राजकुमार पाटील वय ८ वर्षे या दोन लहान मुलांना मोकाट व पिसाळलेल्या कुत्र्याने चावा घेत जखमी केले. ही घटना सायंकाळी पाचच्या दरम्यान घडली, त्यामुळे नागरिकांत भीतीचे वातावरण पसरले आहे. ग्रामपंचायत प्रशासनाने या मोकाट कुत्र्यांचा बंदोबस्त करावा, अशी मागणी ग्रामस्थांतून होत आहे.
उदगाव येथील कदम गल्ली जवळ राहणाऱ्या रुद्र मगदूम या मुलावर प्रथम मोकाट कुत्र्याने हल्ला चढवला. त्यानंतर जोगेश्वरी मंदिरानजीक राहणाऱ्या दानलिंग पाटील या मुलालाही या कुत्र्याने चावा घेत जखमी केले. गावात सतत वाढत जाणार्या या मोकाट कुत्र्यांमुळे ग्रामस्थांना मोठा त्रास होत आहे. ही घटना रविवारी सायंकाळी पाचच्या दरम्यान घडली असून दोन्ही मुलावर सांगली येथील शासकीय रुग्णालयात उपचार सुरू आहेत.