वृत्तसंस्था/ नवी दिल्ली
कोरोना महामारी संकटामुळे संपूर्ण देशात लॉकडाऊनची अंमलबजावणी सुरू असून विविध राज्यातील स्थलांतरीत कामगार आपल्या घरी जाण्यासाठी प्रयत्न करीत आहेत. अशा कामगारांना भारताचा वेगवान गोलंदाज मोहम्मद शमीने आहार आणि पाणी याचे वाटप करून मदतीचा हात पुढे केला आहे.
उत्तरप्रदेशमधील सहासपूर येथे शमीचे निवासस्थान असून या परिसरात स्थलांतरीत कामगारासाठी उघडण्यात आलेल्या मदत केंद्रामध्ये शमीने आहार (अन्न) व पाणी यांचे वाटप केले. भारतीय क्रिकेट मंडळाने शमी मजुरांसाठी देत असलेल्या मदतीचे छायाचित्र प्रसिद्ध केले आहे. बाहेरील राज्यातील कामगारांना स्वगृही जाण्यासाठी बसेस उपलब्ध करून देण्यात आल्या आहेत. भारतामध्ये कोरोना महामारीने सुमारे 5000 लोकांचा बळी घेतला असून सुमारे दोन लाख लोकांना याची लागण झाली आहे.