ऑनलाईन टीम / प्योंगयांग :
उत्तर कोरियाचे हुकूमशहा किम जोंग उन यांनी शत्रू राष्ट्र असलेल्या दक्षिण कोरियाशी सैन्य करार आणि राजनैतिक संबंध तोडण्याचा निर्णय घेतला आहे. आजपासून या दोन्ही देशांदरम्यानच्या संपर्क लाईन आणि राष्ट्रपती कार्यालयातील हॉट लाईन बंद करण्यात येणार आहेत.
उत्तर कोरियामधील काही बंडखोर दक्षिण कोरियामधून काही फुगे सोडतात. तसेच दक्षिण कोरियाच्या सीमेवर पत्रके वाटतात. त्यामध्ये किम जोंग उन यांच्या हुकुमशाहीविरोधात काही संदेशही लिहिलेले असतात. अशा प्रकारची बदनामीकारक पत्रके वाटणाऱ्या लोकांना दक्षिण कोरियाने रोखणे आवश्यक होते. मात्र, तसे झाले नाही. त्यामुळे संतापलेल्या किम जोंग उन यांनी दक्षिण कोरियाशी आलेले सर्व संबंध संपुष्टात आणण्याचा मोठा निर्णय घेतला.
दक्षिण कोरियातून फुगे उडवणाऱ्यांना थांबवण्यासाठी उत्तर कोरियाने अनेकदा पोलिसांद्वारे कारवाई केली होती. पण यावर बंदीची उत्तर कोरियाची मागणी मात्र फेटाळण्यात आली होती. त्यामुळे किम जोंग उन यांच्या बहिणीने यापूर्वीच दक्षिण कोरियाला सैन्य करार आणि इतर संबंध संपुष्टात आणण्याचा इशारा दिला होता.