तज्ञ समितीने मागवला क्लिनिकल चाचणीचा डेटा, कोव्हिशिल्ड बूस्टर डोसला सद्यस्थितीत ‘ब्रेक’
नवी दिल्ली / वृत्तसंस्था
देशात कोरोना संसर्गाची स्थिती नियंत्रणात असली तरी नव्या ओमिक्रॉन व्हेरियंटमुळे चिंतेचे ढग कायम आहेत. ओमिक्रॉनच्या संभाव्य धोक्यामुळे बूस्टर डोस देण्याचा विचार सुरू असला तरी वैद्यकीय चाचण्यांशिवाय कोरोनाचा बूस्टर डोस मंजूर केला जाऊ शकत नाही, असे सेंट्रल ड्रग्ज स्टँडर्ड कंट्रोल ऑर्गनायझेशन (सीडीएससीओ) अंतर्गत विषय तज्ञ समितीने (एसईसी) स्पष्ट केले. सीरम इन्स्टिटय़ूटच्या अर्जाचा आढावा घेतल्यानंतर पॅनेलने अतिरिक्त डेटा मागवला आहे. क्लिनिकल चाचण्यांबाबत रितसर माहिती सादर केल्यानंतरच सदर समिती दुसरी बैठक घेऊन बूस्टर डोसला हिरवा कंदील दाखवू शकते. साहजिकच सद्यस्थितीत तातडीने लोकांना बूस्टर डोस मिळण्याची शक्यता कमी आहे.
ओमिक्रॉन हा कोरोनाचा नवीन व्हेरियंट समोर आल्यानंतर सीरम इन्स्टिटय़ूटने बूस्टर डोस म्हणून कोव्हिशिल्ड लस वापरण्याची परवानगी मागितली होती. आपल्याकडे लसीचा पुरेसा साठा असून बूस्टर डोसची मागणी वाढत असल्याचा दावा त्यांनी केला होता. ब्रिटनने ‘एक्स्ट्राजेनेका’च्या बूस्टर डोसला मान्यता दिल्याचे सीरम इन्स्टिटय़ूटने ड्रग्ज कंट्रोलर जनरल ऑफ इंडियाकडे अर्ज दाखल करताना सांगितले होते. या मागणीनंतर वैद्यकीय तज्ञांच्या उच्चस्तरीय बैठकीमध्ये यासंबंधी चर्चा सुरू झाली असली तरी कोव्हिशिल्डच्या लसीला बूस्टर डोससाठी अद्याप अंतिम मंजुरी मिळालेली नाही. देशाच्या लसीकरणावरील राष्ट्रीय तांत्रिक सल्लागार गटाने देशातील कोरोनाच्या बूस्टर डोसबाबत व्हर्च्युअल बैठक घेतली. परंतु या बैठकीत कोणताही अंतिम निर्णय होऊ शकला नाही. या बैठकीनंतर अद्याप बूस्टर डोसला मान्यता दिलेली नसल्याची माहितीही सूत्रांनी दिली. कोव्हिशिल्डबरोबरच अन्य कंपन्यांच्या लसींचा विचारही बैठकीमध्ये करण्यात आला.
देशात सध्या लसीकरणाची गती वाढविण्यावर भर दिला जात आहे. सध्या निर्धारित वयोगटातील केवळ 50 टक्के लोकांनी दोन्ही डोस घेतलेले आहेत. तर 80 टक्के लोकांनी केवळ एकच डोस घेतलेला असल्याने आता लसीच्या दोन्ही मात्रा सर्व लाभार्थींपर्यंत पोहोचवण्यावर भर देण्याची सूचना तांत्रिक सल्लागार गटाच्या बैठकीत करण्यात आली आहे.
ज्या लोकांना पूर्णपणे लसीकरण करण्यात आले होते त्यांना देखील ओमिक्रॉन व्हेरियंटची लागण झाली आहे. ओमिक्रॉन डेल्टापेक्षा अधिक संसर्गजन्य असल्याचे मानले जाते. याचा अर्थ ते अधिक वेगाने पसरत असल्यामुळे बूस्टर डोसची चर्चा सुरू झाली आहे.. कोरोनाच्या विविध प्रकारांवर लसीची परिणामकारकता देखील कालांतराने कमी होते. साहजिकच लसीची परिणामकारकता कमी असल्यास बूस्टर डोस घ्यावा लागणार असल्याचे अभ्यासातून दिसून आले आहे.
बूस्टर डोस आवश्यक का?
दुसरा डोस घेण्यास 6 ते 9 महिने पूर्ण केलेल्यांना बूस्टर डोस द्यावा असा विचार सध्या काही तज्ञांनी मांडला आहे. अँटिबॉडीज 6 ते 9 महिन्यांनंतर कमी होण्याची शक्यता असल्याने आता बूस्टर डोस दिल्यास भविष्यात लोक कोरोना विषाणूशी अधिक प्रभावीपणे सामना करतील, असे मत पाटणा मेडिकल कॉलेजमधील मायक्रो व्हायरोलॉजी विभागाचे माजी प्रमुख डॉ. सत्येंद्र सिंग यांनी स्पष्ट केले आहे.
केंद्र सरकारने पुन्हा राज्यांना केले सतर्क
नाईट कर्फ्यूसह कडक नियम लागू करण्याची सूचना
केंद्र सरकारने पॉझिटिव्हिटी दर जास्त असलेल्या राज्यांना पुन्हा एकदा विशेष सूचना जारी केल्या आहेत. केंद्रीय आरोग्य सचिव राजेश भूषण यांनी काही राज्ये आणि केंद्रशासित प्रदेशांना शनिवारी यासंबंधी पत्रव्यवहार केला. गेल्या दोन आठवडय़ात कोरोना पॉझिटिव्ह दर जास्त नोंदवलेल्या राज्यांना नोटीस जारी केली आहे. कोरोनाचा संसर्ग अधिक असलेल्या भागात रात्रीची संचारबंदी (नाईट कर्फ्यू) लागू करण्यात यावा. तसेच विवाह-अंत्यविधीसारख्या समारंभांसाठी जास्त लोक जमण्यास बंदी घालावी आणि कमी लोकांना येण्यास परवानगी द्यावी, अशा सूचना करण्यात आल्या आहेत. तसेच अधिकाधिक बाधित लोकांचा शोध घेण्यासाठी चाचण्यांचा वेग वाढवण्याची सूचनाही पत्रात नमूद करण्यात आली आहे.