वृत्तसंस्था/ कोलकाता
येथे सुरू असलेल्या रणजी करंडक क्रिकेट स्पर्धेतील बाद फेरीच्या सामन्यात रविवारी खेळाच्या दुसऱया दिवशी झारखंडचा 17 वर्षीय यष्टीरक्षक आणि फलंदाज कुमार कुशाग्रने नागालँडविरूद्ध दणकेबाज द्विशतक (266) झळकविले. त्याच्या कामगिरीमुळे झारखंडने पहिल्या डावात 177 षटकांत 9 बाद 769 धावा जमविल्या.
या सामन्यात झारखंडने 5 बाद 402 या धावसंख्येवरून खेळाला पुढे प्रारंभ केला. कुशाग्रने 269 चेंडूत 2 षटकार आणि 37 चौकारांसह 266 धावा झळकविल्या. प्रथमश्रेणी क्रिकेटमधील त्याचे हे पहिले शतक आहे. 2020 साली दक्षिण आफ्रिकेच्या दौऱयावर गेलेल्या भारताच्या 19 वर्षांखालील युवा संघामध्ये त्याचा समावेश होता. झारखंड संघातील शाबाज नदीमने 223 चेंडूत 1 षटकार 14 चौकारांसह नाबाद 123 धावा झळकविताना कुशाग्रसमवेत सातव्या गडय़ासाठी 166 धावांची भागिदारी केली. कुशाग्रने 213 चेंडूत आपले द्विशतक पूर्ण केले. झारखंड संघातील विराट सिंगने शानदार 107 धावांचे योगदान दिले. नागालँडतर्फे के लामतूर आणि आय लामतूर यांनी प्रत्येकी 3 गडी बाद केले.
संक्षिप्त धावफलक
झारखंड प. डाव 177 षटकांत 9 बाद 769 (कुमार कुशाग्र 266, नदीम खेळत आहे 123, विराट सिंग 107)