प्रतिनिधी/रत्नागिरी
रत्नागिरी साखरतर येथील 6 महिन्याच्या बाळाचे रिपोर्ट कोरोना पॉझिटिव्ह आल्याने एकच खळबळ उडाली आहे. कोरोनाबाधित महिलेच्या घरातील हे बाळ असून यामुळे रत्नागिरीकरांच्या चिंतेत वाढ झाली आहे. आता रत्नागिरीत कोरोना रुग्णांची संख्या 6 वर जाऊन पोहचली आहे.
रविवारी रात्री 42 जणांचे रिपोर्ट आले. यामध्ये एका सहा महिन्याच्या बाळाचे रिपोर्ट पॉझिटिव्ह आले आहेत. संबंधित बाळाच्या आजी पॉझिटिव्ह असून तिच्यावर यापूर्वीच उपचार सुरू आहे, त्यामुळे साखरतर येथील एकाच कुटुंबातील 3 रूग्ण आतापर्यंत पॉझिटिव्ह आले आहेत. या कुटुंबातील 17 लोकांना क्वारंटाईन करण्यात आले आहे. बाळावर सिव्हिल मध्ये उपचार सुरु असून घाबरून जाण्याची आवश्यकता नसल्याचे जिल्हाधिकारी लक्ष्मीनारायण मिश्रा यांनी सांगितले.