प्रतिनिधी/ बेळगाव
रस्त्यावर चलनी नोटा सापडण्याचे प्रकार सुरूच आहेत. मात्र या नोटा कोण टाकत आहेत? त्यांचा उद्देश काय आहे? याबाबत तर्कवितर्क वर्तविण्यात येत आहेत. शनिवारी सकाळी आपटेकर गल्ली महाद्वार रोड मुख्य रस्त्याशेजारी 200 रुपयाची नोट आढळून आली आहे. सदर नोट एका युवकाने घेतली होती. यावेळी वन टच फौंडेशनचे अध्यक्ष विठ्ठल पाटील तेथून जात असताना ही बाब त्यांच्या निदर्शनास आली. त्यांनी आपल्याजवळील सॅनिटायझर घेऊन त्या युवकावर आणि नोटेवर शिंपडले. तसेच ही नोट न घेण्याबाबत त्या युवकास सांगितले.
शनिवारी गजाननराव भातकांडे शाळेसमोर भाजीपाला विक्री सुरू होती. यावेळी मोठय़ा प्रमाणात खरेदीसाठी नागरिक ये-जा करीत होते. याचवेळी रस्त्याशेजारी 200 रुपयाची चलनी नोट आढळून आली. एका युवकाने ही नोट उचलली. मात्र कोरोनामुळे असे प्रकार जाणुनबुजून करण्यात येत असून नागरिकांनी दक्षता घेणे गरजेचे आहे. तसेच असे प्रकार करणाऱयांचा शोध घेणेही गरजेचे बनले आहे.