जिल्हाधिकारी डॉ. अभिजीत चौधरी यांचे आदेश
सांगली/प्रतिनिधी
सांगली, मिरज, कुपवाड शहर महानगरपालिका हद्दीतील प्रभाग क्र. 8 मधील रघुवंशी कॉलनी येथे राजमाता पुण्यश्लोक अहिल्यादेवी होळकर यांचे स्मारक उभारण्यात आलेले आहे. स्मारकाचा लोर्कापण सोहळ्याच्या कारणावरून कायदा व सुव्यवस्थेचा प्रश्न निर्माण होण्याची शक्यता आहे. या पार्श्वभूमीवर जिल्हादंडाधिकारी डॉ. अभिजीत चौधरी यांनी महानगरपालिका हद्दीतील प्रभाग क्रमांक 8 मधील रघुवंशी कॉलनी, राजमाता पुण्यश्लोक अहिल्यादेवी होळकर स्मारक आण 100 मीटर परिसरात 2 एप्रिल पर्यंत संचारबंदी लागू केली आहे.
स्मारक परिसरात लोकांनी विनाकारण जमण्यास व गटागटाने फिरण्यास मनाई केली आहे. स्मारक परिसरात कोणताही दाहक पदार्थ, कोणताही स्फोटक पदार्थ व अन्य धोकादायक साधने सोबत नेण्यास मनाई केली आहे. स्मारक परिसरात घोषणा देणे, वाद्ये वाजविण्यास वा फलक लावण्यास अथवा प्रसारीत करण्यास मनाई केली आहे. स्मारक परिसरात सभा घेणे तसेच लाठी, काठी, शस्त्र घेवून प्रवेश करण्यास मनाई केली आहे. शासकीय परवानगी शिवाय स्मारक परिसरात कोणताही मंडप घालण्यास मनाई केली आहे.
स्मारक परिसराच्या सुरक्षिततेच्या दृष्टीने पूर्ण बॅरिकेटींग करण्याच्या दृष्टीने आणि स्मारकाच्या सुरक्षिततेच्या दृष्टीने काळजी घेण्याच्या पार्श्वभूमीवर आयुक्त, सांगली मिरज कुपवाड शहर महानगरपालिका यांनी पोलीस प्रशासनाशी समन्वये साधून कार्यवाही करण्यासाठी सक्षम अधिकाऱ्याची नियुक्ती करावी, असे आदेश जिल्हादंडाधिकारी डॉ. अभिजीत चौधरी यांनी दिले आहेत.