प्रतिनिधी/ पणजी
राज्यात आज सर्वत्र दत्तजयंती उत्सव साजरा करण्यात येईल. मुख्य समारंभ गोव्याची नरसोबावाडी म्हणून ओळखल्या जाणाऱया सांखळी येथील श्री दत्तमंदिरात होणार आहे. त्याचबरोबर म्हापसा दत्तवाडी येथील दत्त देवस्थान, कुंडई येथील पद्मनाभ संप्रदायातर्फे दत्तजयंती तसेच केपे येथील दत्त मंदिर, सावईवेरे येथे दत्तमंदिर तसेच ताळगाव येथील दत्तमंदिरात देखील विशेष कार्यक्रम होतील. कोरोना महामारीमुळे यंदाच्या उत्सवावर बरेच नियंत्रण आले असून हा उत्सव यंदा सर्वच देवस्थानांनी अत्यंत मर्यादित स्वरुपात करण्याचे ठरविले आहे. त्यामुळे या उत्सव काळात दुकाने वगैरे असणार नाहीत. शिवाय मंदिरात प्रवेश देखील मर्यादित काळात ठेवण्यात आलेला आहे. सायंकाळी 5 वा. दत्तजन्म सोहळा आयोजित केला जातो तो देखील यावर्षी सार्वजनिक स्वरुपात होणार नसल्याचे वृत्त आहे.