बेंगळूर : कोरोनाबाधित रुग्णांची संख्या वेगात वाढल्याने बेंगळूरसह अनेक शहरातील रुग्णालयात वैद्यकीय ऑक्सिजनचा तुटवडा असल्याची चर्चा आहे. बऱयाच रुग्णालयातील रुग्ण ऑक्सिजनपासून वंचित आहेत. रविवारी दिल्ली आणि महाराष्ट्रातील सरकारने ऑक्सिजनचा तुटवडा असल्याची तक्रार केली आहे. मात्र, राज्यातील जनता याबाबत भीती बाळगू नये. राज्यात ऑक्सिजनचा तुटवडा नाही, असे आरोग्यमंत्री डॉ. के. सुधाकर यांनी टविट्रद्वारे स्पष्ट केले आहेत.
कर्नाटकात 7 वैद्यकीय ऑक्सिजन उत्पादन केंद्रे आहेत. याठिकाणी दिवसाला 812 टन ऑक्सिजन उत्पादन करण्याची क्षमता आहे. तर शनिवारी 272.61 टन ऑक्सिजनचा वापर करण्यात आला आहे. असे असताना राज्यात ऑक्सिजनचा तुटवडा असल्याची अफवा पसरवत नागरिकांमध्ये भीती निर्माण करण्याचे काम कोणीही करू नये, असे त्यांनी सांगितले.