वृत्तसंस्था / बिजींग
चिनी स्मार्टफोन कंपनी रियलमीने आपला नवा रियलमी 7 5जी स्मार्टफोन नुकताच लाँच केला आहे. आपल्या 7 सिरीजच्या फोनचा विस्तार करण्याहेतू कंपनीने आपला फोन प्रथम युरोपियन बाजारात लाँच केला आहे. सदर फोन 6 जीबी रॅम आणि 128 जीबी स्टोरेजसह येणार असून ज्याची किंमत 27 हजार 400 रुपये असणार आहे. 27 ते 30 नोव्हेंबरच्या कालावधीत ब्लॅक फ्रायडे सेलवर ऑफरअंतर्गत हा फोन खरेदी करायला गेल्यास तो सवलतीत 22 हजार 500 रुपयांना मिळणार असल्याचे कंपनीने म्हटले आहे. रियलमीने ब्लॅक फ्रायडे सेलसाठी ऍमेझॉनसोबत करार केला असून यांच्या पोर्टलवर अधिकृतरित्या सदरचा फोन विक्रीसाठी उपलब्ध करण्यात येणार असल्याचेही सांगितले जाते. 6.5 इंचाची फुल एचडी डिस्प्ले स्क्रीन असणाऱया या फोनला समोर सेल्फीसाठी 16 एमपीचा कॅमेरा असणार आहे. तर बॅटरी 5 हजार एमएएचची असणार आहे. जलदगतीने चार्ज होणारे तंत्रज्ञान या फोनमध्ये असणार आहे.