20 टक्के हिस्सेदारी विकणारः लवकरच करार पूर्ण
वृत्तसंस्था/ मुंबई
प्रसिद्ध उद्योगपती मुकेश अंबानी यांची रिलायन्स इंडस्ट्रिज ही कंपनी तेल रिफायनिंग आणि पेट्रो रसायन उद्योगातील 20 टक्के वाटा विक्रीसाठी सऊदीमधील कंपनी अरामकोबरोबर रोख व शेअर्स स्वरूपात करार करण्याविषयी चर्चा करत असल्याचे समजते. याला लवकरच अंतिम स्वरुप मिळणार असल्याचे समजते.
अंबानी यांनी ऑगस्ट 2019 मध्ये तेल व रसायन व्यवसायमधील 20 टक्के हिस्सेदारी जगातील सर्वात मोठी तेल निर्यात कंपनीला विकण्याची घोषणा केली होती. या व्यवहारात गुजरातच्या जामनगरमधील 2 तेल रिफायनरी आणि पेट्रोरसायन मालमत्तेचा समावेश आहे. सदरचा व्यवहार हा मार्च 2020 मध्ये पूर्ण होणार होता. पण त्याला आता उशीर होत असला तरी त्याचे कारण मात्र स्पष्ट करण्यात आलेले नाही. अलीकडच्या आठवडय़ात दोन्ही कंपन्यांमध्ये या व्यवहाराबाबत चर्चा सुरू झाली असल्याचे वृत्त आहे. या चर्चेअंतर्गत व्यवहारांची दिशा नक्की होणार असल्याचे सांगितले जात आहे.
शेअर्स आणि रोख रक्कमेच्या स्वरूपात हा व्यवहार होणार आहे. अरामको व्यवहारात सुरूवातीला शेअर्स आणि नंतर अनेक वर्षे रोख रक्कम भरणा करण्याबाबत विचार करते आहे. अटी नियमांनुसारच सदरच्या व्यवहाराला अंतिम स्वरूप देण्यात येणार असल्याचे सांगण्यात येत आहे.