उचगाव / वार्ताहर
रेल्वे रूळ ओलांडताना रेल्वे इंजिनची धडक बसून अश्विनी अमोल धुमाळे (वय 35) रा.चिंचवाड ता.करवीर या मुकबधीर महिलेचा जागीच मृत्यू झाला. ही दूर्दैवी घटना गुरुवारी दुपारी अडीच वाजण्याच्या सुमारास चिंचवाड स्मशानभूमी जवळ घडली.
याबाबत पोलिसांकडून मिळालेली अधिक माहिती अशी,अश्विनी धुमाळे नेहमीप्रमाणे चिंचवाड येथील इलेक्ट्रिकल दुकानात कामास गेली होती. तिच्या अचानक पोटात दुखू लागल्याने ती चिंचवाड येथील घरी येण्यास निघाली होती.
ती मूकबधिर असल्याने तिला बोलता व ऐकण्यास येत नव्हते. चिंचवाड येथील स्मशानभूमी लगत असणारे रेल्वेरूळ ओलांडून घरी जात होती. त्याच दरम्यान रेल्वे इंजिन कोल्हापूरहुन मिरजकडे जात होते. रेल्वे ड्रायव्हरने हॉर्न केला पण तिला ऐकु न आलेने तिला रेल्वे इंजिनची जोराची धडक बसल्याने तिचा जागीच मृत्यू झाला. तिच्या घरामध्ये एक भाऊ व बहीण ही मुकबधीर आहेत.
तिचा विवाह ही एका मुकबधीर इसमाशी झाला आहे. या घटनेने चिंचवाडसह परीसरात हळहळ व्यक्त होत आहे. या घटनेची फिर्याद चुलते विजय भाऊ कांबळे यांनी गांधीनगर पोलीस ठाण्यात दिली आहे. या अपघाताचा तपास पोलीस हवालदार विराज डांगे करत आहेत.