प्रतिनिधी / बेळगाव
शिवनूर, ता. अथणी येथील एका दूध उत्पादक सहकारी संघाचे बायलॉज अनुमोदन देऊन पोचपावती देण्यासाठी तीन हजार रुपयांची लाच घेताना चिकोडी सहकार खात्याच्या कार्यालयातील कर्मचाऱयाला रंगेहाथ अटक केली आहे. एसीबीच्या अधिकाऱयांनी सोमवारी ही कारवाई केली.
बाळाप्पा सिद्धाप्पा बनहट्टी हे शिवनूर दूध उत्पादक सहकारी संघाचे कार्यकारी अधिकारी आहेत. बॉयलॉजला अनुमोदन देण्यासाठी त्यांनी सहकार खात्याकडे पाठविले होते. त्यासाठी साहाय्यक निबंधक कार्यालयातील चेतन हंजी यांनी तीन हजार रुपये लाच मागितली होती.
यामुळे बाळाप्पा यांनी एसीबीकडे तक्रार केली होती. पोलीस अधीक्षक बी. एस. नेमगौडा यांच्या मार्गदर्शनाखाली अधीक्षक एल. वेणुगोपाल, निरीक्षक एच. सुनीलकुमार व त्यांच्या सहकाऱयांनी सोमवारी छापा टाकून लाच स्वीकारताना चेतन हंजीला अटक केली आहे.