वृत्तसंस्था /बाकू
ऍरॉन रॅमसे व कॉनर रॉबर्टस् यांनी दोन्ही सत्रात प्रत्येकी एक गोल केल्यानंतर वेल्सने युरो चषक स्पर्धेतील साखळी सामन्यात तुर्कीचा 2-0 असा एकतर्फी धुव्वा उडवला. रॅमसेने पहिल्या सत्रात 43 व्या मिनिटाला पहिला गोल केला तर कॉनरने स्टॉपेज टाईममध्ये संघाचा दुसरा गोल नोंदवला. वेल्सचा कर्णधार गॅरेथ बॅलेने पेनल्टीची नामी संधी दवडली होती. पण, नंतर स्टॉपेज टाईममध्ये कॉनरला मोलाचा पास देत त्याने अपयशाची काही प्रमाणात भरपाई केली.
बाकूमध्ये संपन्न झालेल्या या लढतीत तुर्कीचे चाहते मोठय़ा प्रमाणात हजर होते. मात्र, तुर्कीचा संघ या लढतीत चाहत्यांची अपेक्षा पूर्ण करु शकला नसल्याचे निकालावरुन स्पष्ट झाले. मागील आठवडय़ात वेल्स-स्वित्झर्लंड यांच्यातील अनिर्णीत लढतीला 8782 चाहते हजर होते.