प्रतिनिधी / बेळगाव
वैभवनगर येथील तरुणाने राहत्या घरी पंख्याला गळफास घेऊन आत्महत्या केल्याची घटना रविवारी रात्री घडली. रमेश यल्लाप्पा गौडर वय 28 रा. वैभवनगर दुसरा क्रॉस असे आत्महत्या केलेल्या तरुणाचे नाव आहे. याप्रकरणी रमेशची पत्नी लक्ष्मी यांनी एपीएमसी पोलीस स्थानकात एफआयआर दाखल केला आहे. रमेश हा व्यवसायाने रिक्षाचालक होता. लॉकडाऊन काळात त्याने कर्ज घेतले होते. हे कर्ज फेडता न आल्याने तणावातून त्याने आत्महत्या केल्याचे बोलले जात आहे. सीपीआय जावेद मुशापुरी व त्यांचे सहकारी पुढील तपास करीत आहेत. सिव्हील हॉस्पिटल येथे शवविच्छेदन करून उत्तरीय तपासणीनंतर मृतदेह नातेवाईकांच्या ताब्यात देण्यात आला.