नवी दिल्ली / वृत्तसंस्था
ज्यांचे वय 45 वर्षांच्या वर आहे आणि ज्यांना अन्य काही आजार आहेत, अशा व्यक्तींना कोरोनाची लस घ्यायची असेल तर त्यांना वैद्यकीय प्रमाणपत्राची आवश्यकता आहे, असे स्पष्टीकरण सरकारच्या कृती दलातील एका अधिकाऱयाने दिले आहे. केंद्र सरकारने दोन दिवसांपूर्वी देशव्यापी लसीकरणाचा कार्यक्रम घोषित केला होता. त्यानुसार 60 वर्षांवरील लोकांना तसेच 45 वर्षांवरील व्याधीग्रस्तांना विनामूल्य लस देणार असल्याचे स्पष्ट केले होते.
यासंबंधीचे अधिक स्पष्टीकरण गुरूवारी करण्यात आले. 45 वर्षांवरच्या अनेक लोकांना मधुमेह, हृदयविकार, संधीवात, फुप्फुसदोष अशा प्रकारचे विकार असतात. त्यांना कोरोनाची लस देताना विशेष दक्षता घ्यावी लागते. म्हणून त्यांनी ही लस घेण्यापूर्वी वैद्यकीय प्रमाणपत्र सादर करणे आवश्यक आहे. अशा ज्या व्यक्ती प्रमाणपत्र सादर करतील, त्यांना लस दिली जाईल, असे सांगण्यात आले.