वृत्तसंस्था/ ढाका
बांगलादेशचा अष्टपैलू शकीब अल हसन आता पूर्ण फिट झाला असून पाकिस्तानविरुद्ध होणाऱया दुसऱया कसोटीसाठी त्याचे संघात पुनरागमन झाले आहे.
गेल्या महिन्यात झालेल्या टी-20 विश्वचषक स्पर्धेत विंडीजविरुद्धच्या सामन्यावेळी त्याला धोंडशिरेची दुखापत झाली होती. त्यामुळे ती स्पर्धा आणि नंतर नोव्हेंबरमध्ये पाकविरुद्ध झालेल्या तीन सामन्यांची टी-20 मालिकाही त्याला हुकली होती. पहिल्या कसोटीसाठीही त्याची निवड करण्यात आली होती. पण अंतिम निवडीवेळी त्याला अनफिट ठरविण्यात आले. त्याच्या गैरहजेरीत तैजुल इस्लामने आपल्या फिरकीवर 116 धावांत 7 बळी मिळविल्याने बांगलादेशला पाकवर पहिल्या डावात आघाडी मिळाली होती. पाकने हा सामना जिंकून मालिकेत आघाडी घेतली आहे. 4-8 डिसेंबरपर्यंत होणाऱया दुसऱया कसोटीत बांगलादेशने वेगवान गोलंदाज तस्किन अहमदलाही संघात स्थान दिले आहे. बोटाच्या दुखापतीमुळे त्यालाही पहिली कसोटी हुकली होती.