प्रतिनिधी/ बेळगाव
शारदोत्सव महिला सोसायटीतर्फे सुरू असलेल्या ऑनलाईन काव्य शाळेत दि. 11 रोजी डॉ. संध्या देशपांडे या ‘भाव कविता’ या विषयावर बोलणार आहेत. त्यांचा परिचय पुढीलप्रमाणे….
डॉ. संध्या देशपांडे एमए पीएचडी असून एमएला मराठी विषयात विद्यापीठात त्या प्रथम आल्या होत्या. जीएसएस व आरपीडी कॉलेजमध्ये मराठी विभागप्रमुख म्हणून काम करून त्या निवृत्त झाल्या. संत साहित्य आणि मराठी नाटक हे त्यांच्या अभ्यासाचे विषय आहेत. एकांकिका : स्वरुप आणि दिशा या प्रबंधास व प्रायोगिक रंगभूमी ही व्यावसायिक रंगभूमीची प्रयोगशाळा आहे, या प्रबंधास पुण्याचा भगवान पंडित पुरस्कार प्राप्त झाला आहे.
अश्रद्ध, सुलतान, बी पॉझिटिव्ह या त्यांच्या कादंबऱया असून अंत:स्थ, जीना इसी का नाम, मेघ बंधन, कहाणी गोमुक्ती संग्रामाची ही नाटके आहेत. गाणगंगा हे गंगुबाई हणगल यांचे चरित्र त्यांनी लिहिले आहे. चंद्रशेखर कंबारांच्या ‘सीरी संपीगे’चा चाफा या नावाने तर डी. एस. चौगुले यांच्या दिशांतर नाटकाचा त्याच नावाने अनुवाद केला आहे. बसवेश्वरांच्या 200 वचनांचा त्यांनी अनुवाद केला असून तिची कथाच वेगळी हा त्यांचा कथासंग्रह आहे. अनेक विषयांवर त्यांनी पथनाटय़े लिहिली आहेत.
विंदा, कुसुमाग्रज, कृ. ब. निकुंब, इंदिरा संत व रामाणी, गदिमा आणि सुधीर फडके, मंगेश पाडगावकर यांच्या साहित्यांवर आणि काव्यांवर त्यांनी अनेक कार्यक्रम बसविले आहेत. त्यांना वूमन अचिवर्स अवॉर्ड, नाटय़ भूषण बेळगाव पुरस्कार, समाज भूषण पुरस्कार-मुंबई व सीरीगन्नड राष्ट्रीय प्रति÷ान पुरस्कार मिळाले आहेत.