प्रतिनिधी / बेळगाव
पोलीस दलात केलेल्या उल्लेखनीय सेवेबद्दल मुख्यमंत्र्यांचे पदक प्राप्त केलेल्या हवालदार अजय उर्फ अप्पू तुक्कार यांचा शाहूनगर येथील मराठा कॉलनी रहिवाशांच्यावतीने हृद्य सत्कार करण्यात आला.
अजय तुक्कार हे येथील कॅम्प पोलीस स्थानकात हवालदार म्हणून सेवा बजावतात. पोलीस ध्वजदिनी मुख्यमंत्री बी. एस. येडियुराप्पा यांच्या उपस्थितीत गृहमंत्री बसवराज बोम्माई यांच्या हस्ते त्यांना मुख्यमंत्रिपदक बहाल करण्यात आले आहे. यावेळी मराठा कॉलनी रहिवासी संघटनेचे अध्यक्ष रमेश हुक्केरी, उपाध्यक्ष अभिषेक लक्कुंडी, किरण सांगळेकर, जगदीश हिरेमठ, विजय रसाळकर, गंगाधर गाणगेर आदी उपस्थित होते. अजय यांचा सपत्निक गौरव करण्यात आला. ते मूळचे हुदली येथील राहणारे असून सध्या मराठा कॉलनी येथे त्यांचे वास्तव्य आहे. आपल्या कॉलनीतील एका रहिवाशाला मुख्यमंत्र्यांचे पदक मिळाल्याचा आपल्याला अभिमान वाटतो, असे येथील रहिवाशांनी सांगितले.