प्रतिनिधी / पणजी
राज्यातील सर्व शिक्षक व शिक्षकेतर कर्मचाऱयांनी आज बुधवार 24 जूनपासून नियमित शाळेत हजर राहून सेवा बजावावी असा आदेश गोवा शिक्षण संचालनालयाने दिला आहे. त्यासंबंधीचे परिपत्रक मंगळवारी जारी करण्यात आले आहे.
सर्व शाळा व्यवस्थापनांनी विद्यार्थ्यांच्या सर्वांगिण विकासावर भर द्यावा. तसेच विविध कारणांमुळे ऑनलाईन वर्गात सहभागी होऊ शकत नाहीत, अशा विद्यार्थ्यांच्या अडचणी समजून घ्याव्यात. त्यांच्यासाठी वेगळ्या उपाययोजना करुन अभ्यासक्रम पूर्ण करावा, असे आदेशात म्हटले आहे.
विद्यार्थ्यांशी शाळेचा संपर्क रहावा यासाठी ऑनलाईन वर्ग सुरु करण्यात आले होते. आता शाळा सुरु झाल्यास शिक्षकांनी 2020-21 शैक्षणिक वर्षाचा अभ्यासक्रम विद्यार्थ्यांकडून पूर्ण करुन घ्यावा, असे सूचविण्यात आले आहे.
दरम्यान, कंटेनमेंट झोनमध्ये असलेल्या शाळा तसेच या झोनमध्ये राहणारे शिक्षक तथा शिक्षकेतर कर्मचाऱयांना हे परिपत्रक लागू होणार नाही. अशा शिक्षकांनी घरातूनच काम करावे, असेही पत्रकात स्पष्ट करण्यात आले आहे.