पाडळी ते अंत्री रस्त्यावर झाडं पडल्याने वाहतूक काही वेळ ठप्प
शिराळा / वार्ताहर
शिराळा तालुक्यात दुपारच्या सुमारास वादळी वाऱ्यासह ढगांच्या कडकडात सुमारे तासभर जोरदार पाऊस झाला. तर उतरभागातील पाडळी ते अंत्री रस्त्यावर झाडं पडल्याने वाहतूक काही वेळ ठप्प होती. या वादळी वाऱ्यात गोरक्षनाथ मंदिर शेजारी असणाऱ्या युवराज हरी गायकवाड यांच्या शेतातील घरावरील पत्रे उडून गेले आहेत. यात त्यांचे हजारो रुपयांचे नुकसान झाले आहे.
गोरक्षनाथ मंदिर शेजारी दक्षिणेला युवराज हरी गायकवाड यांची शेती आहे. त्यांनी शेतात राहणे करिता व जनावरांच्या साठी पक्के पत्र्याचे शेड वजा घर बांधले होते. विद्युत कनेक्शन देखील होते. आज दुपारी वळीवाचा वादळी वाऱ्यासह पाऊस झाला. यामध्ये या शेड वजा घरावरील सर्व पत्रे उडून गेले आहेत. विद्युत कनेक्शन देखील तारा तुटून बंद पडले आहे. यात त्यांचे हजारो रुपयांचे नुकसान झाले आहे. सुदैवाने कोणतीही जीवित हानी झालेली नाही.