प्रतिनिधी /जत
जत तालुक्यातील शेगाव येथील कापड व्यापारी विनोद विलास भोईटे यांच्या बंद घराचे कुलूप तोडून चोरट्यांनी ३ लाख८० हजार रुपयांचा सोने-चांदी व रोख रक्कम असा मुद्देमाल लंपास केला. ही घटना गुरुवारी रात्री घडली.
काल रात्री भोईटे कुटुंबीय आपल्या शेताकडे गेले होते, सकाळी घरी येऊन पाहिले असता चोरी झाल्याचे त्यांच्या लक्षात आले. त्यांनतर भोईटे यांनी जत पोलीस ठाण्यात फिर्याद दाखल केली. बंद घराचे कडी-कोयंडा उचकटून चोरट्यांनी आत प्रवेश केला होता. चोरट्यांनी कपाटातील १ लाख ७० हजार रुपये किंमतीच्या तीन तोळ्यांच्या तीन अंगठ्या, १० हजार रुपयांची चांदीची नाणी व रोख रक्कम असे मिळून ३ लाख ८० हजार रुपये असा मुद्देमाल लंपास केला आहे.
दरम्यान, चोरटे चोरी करून जात असताना शेगाव येथील एका सीसीटीव्ही कॅमेऱ्यात कैद झाले आहे. त्यातील वर्णनानुसार एकास जत पोलिसांनी ताब्यात घेतले आहे. चोरीननंतर श्वान पथक बोलविले होते. मात्र चोरटे वाहनाने गेल्याने श्वान तेथेच घुटमळले. संशयिताची कसून चौकशी सुरू असून पोलिसांचे पथक तपासासाठी बाहेरगावी पाठविण्यात आले आहे.