ऑनलाईन टीम / पुणे :
पुण्यात शौचालयाची टाकी साफ करताना चार तरुण टाकीत पडले. यामधील तीन तरुणांचा मृत्यू झाला असून, एकाला वाचविण्यात यश आले आहे. पुण्यातील लोणी काळभोर परिसरातील हॉटेल प्यासा जवळ ही घटना घडली.
प्यासा हॉटेलच्या मागीलबाजूस जय मल्हार कृपा बिल्डिंग आहे. त्या बिल्डिंगच्या शौचालयाची टाकी उपसण्यासाठी चार तरुण आले होते. टाकीत पाईप टाकताना एक तरुण तोल जावून टाकीत पडला. या तरुणाला वाचवण्याच्या प्रयत्नात असलेले तीन तरुणही त्याच टाकीत पडले. या घटनेची माहिती मिळताच लोणी काळभोर पोलीस तातडीने घटनास्थळी दाखल झाले. पोलीस आणि स्थानिक नागरिकांच्या मदतीने चौघांना बाहेर काढण्यात आले. त्यापैकी तिघांचा मृत्यू झाला आहे. तर बेशुद्धावस्थेत असलेल्या एकाला वाचविण्यात यश आले. त्याला तात्काळ उपचारासाठी रुग्णालयात दाखल करण्यात आले आहे.