कोलंबो
श्रीलंकेचे पंतप्रधान महिंदा राजपक्षे यांच्या सरकारने देशात गोहत्येवर बंदी घालण्याचा निर्णय घेतला आहे. राजपक्षे यांनी स्वतःच्या सत्तारुढ श्रीलंका पोडुजना पेरुमना या पक्षाच्या संसदीय समितीला गोहत्येवर बंदी घालणारे विधेयक लवकरच मांडले जाणार असल्याचे कळविले आहे. परंतु देशात गोमांस सेवनावर बंदी नसणार आहे. गोमांसाची आयात करता येणार असल्याचे सरकारने स्पष्ट केले आहे. बुद्ध शासन, धार्मिक आणि सांस्कृतिक विभाग राजपक्षे यांच्याकडेच आहेत. यासंबंधीचा प्रस्ताव कधी मांडणार हे मात्र त्यांनी अद्याप स्पष्ट केलेले नाही. श्रीलंकेत बौद्धधर्मीयांचे प्रमाण अधिक आहे. देशातील बहुतांश लोक मांसाहारी आहेत. परंतु हिंदू आणि बुद्ध धर्म मानणारे गोमांस खात नाहीत. गोहत्येवर बंदी घालण्याची मागणी बौद्ध समुदाय दीर्घकाळापासून करत होता.